Бишкектин борбордук аянтында апта сайын музыкалык кечелер өтүп турат
Бишкектин борбордук "Ала-Тоо" аянтында жайкы мезгилде ачык асман алдындагы музыкалык кечелер өткөрүлүп турат. Бул тууралуу Бишкек шаардык мэриясы кабарлап, калаа тургундарын жана конокторун иш-чарага чакырды.
Белгилүү болгондой, ар аптанын жума жана ишемби күндөрү "Ала-Тоо" аянтындагы фонтандардын жанында Кыргызстандын музыкалык жана маданий мурасын чагылдырган белгилүү чыгармачыл жамааттардын катышуусунда концерттик программалар уюштурулат.
Алгачкы музыкалык кече 5-июнда саат 19:00дө башталат. Көрүүчүлөр үчүн улуттук музыкалык салттарды жана заманбап өзгөчө концерттик программасы менен "Кыргыз Руху" эстрадалык-фольклордук ансамбли концерттик программасын тартуулайт.
Маданий программа 6-июнда саат 19:00дө "Семетей" ансамблинин концерти менен уланат.
Мэриядан ачык асман алдындагы музыкалык кечелер жакындар менен убакыт өткөрүү, жандуу музыкадан ырахат алуу үчүн эң сонун мүмкүнчүлүк болот дешет.
