"Апамды сөккөн үчүн таанышымды өлтүрүп алдым". Аялдар абагындагы аялдар тагдыры (видео)

Бишкектин четинде жайгашкан Степное айылында №2 аялдар түзөтүүчү мекемеси бар. Анда аялдар абактан чыккандан кийинки жашоосуна акча чогултуу үчүн иштешет. Айлыгы колдоруна берилбейт, түзөтүүчү мекеме ар бир абактагы айымга атайын эсеп ачып, ошол жакка чогултат. Топтолгон акчалар айымдар абактан чыккандан кийин берилет. Алар эркиндикке чыкканда жумуш тапканга чейин биринчи керектөөсү үчүн.

Кезектеги каарман Жанар (аты өзгөртүлдү). "Киши өлтүрүү" беренеси менен 10 жылга эркинен ажыратылган. 5 жылы өттү. Учурда абактын ичиндеги наабайканада нан жасап иштейт.