Апасы жол кырсыгынан каза болгон. Анын кызы айдоочу жазадан кутулуп кетет деп кооптонууда
Сауле Айткулова Kaktus.media сайтына жана президент Садыр Жапаровго кайрылды. Ал апасы Миркүл Айткулованын өлүмүнө алып келген кырсык боюнча акыйкат чечим чыгарууну өтүнөт.
2023-жылдын 30-январында "Хонда Фит" үлгүсүндөгү унаанын айдоочусу М.К., жол чырактын кызыл түсүнөн өтүп кетип, жашыл жарыкта жолдон өтүп бара жаткан Миркүл Айткулованы сүзүп алган. Үч күндөн кийин аял алган жараатынан улам каза болгон.
"Экспертизанын корутундусу айдоочу апамдын денесине оор залал келтиргенин көрсөткөн", - дейт Сауле.
Ал Тыныстанов жана Фрунзе көчөлөрүнүн кесилишинде болгон кырсыктын видеосун таап алган.
Айдоочу камалган эмес. Сауле Айткулова Бишкектин Свердлов райондук сотунун тергөө судьясы шектүүнү үй камагына негизсиз бошотту деп эсептейт.
Айткулова мындан улам бул ишти Биринчи Май райондук сотуна мыйзамдуу түрдө кароо өтүнүчү менен президент Садыр Жапаровго жана укук коргоо органдарынын жетекчилерине кайрылууга аргасыз болуп жатканын түшүндүрдү.
"Биз шектүүнүн баш коргоо чарасын өзгөртүү боюнча апелляциялык арыз менен кайрылганбыз. Мен жана менин үй-бүлөм айдоочу тиешелүү жазасын албай калат деп кооптонуп жатабыз, анткени Кыргызстанда көп жылдардан бери мыйзам бузуу болгон жерде тааныш же байланыш аркылуу маселени чечүү маданияты калыптанып калган", - деп жыйынтыктады Сауле Айткулова.
Бул үй-бүлөнүн жактоочусу Төлөн Самаков Kaktus.media сайтына иш сотко өткөндүгүнө байланыштуу аппеляциялык арыз каралбай турганын билдирди.
"Бирок сот отурумдун күнүн белгилей элек. Ошол эле учурда унаа камактан чыккан. Ал ижарага алынган унаа болгон", - деп түшүндүрдү адвокат.
"М.К.кечирим суроо үчүн каза болгон аялдын үй-бүлөсүнө келген эмес. Адвокат кошумчалагандай, тергөө тарабынан М.К.га КР Кылмыш-жаза кодексинин 312-беренесинин 3-бөлүгү менен айып тагылып, 5 жылдан 8 жылга чейин эркинен ажыратуу жазасы каралган. "Ал кызыл күйүп турган учурда жолдон өтүп кеткенин мойнуна алды", - деди жактоочу.
Kaktus.media экинчи тараптын пикирин угууга даяр. Комментарийлер үчүн редакцияга кайрылыңыз.
