Чүйдө бир киши эки жолу өлүмдөн аман калган. Ага кол салгандар дагы бир кишини өлтүрүшкөн
Жогорку Сот мурда соттолбогон бирок адам өлтүрүү жана баңги затын мыйзамсыз сактоо боюнча айыпталган адамга карата өкүм чыгарды.
Аты-жөндөрү өзгөртүлдү.
Иштин материалдарына ылайык, Борис 2018-жылдын 20-октябрында мас абалында Москва районунун Садовое айылына жакын жерде Кирилл менен алдын ала макулдашып, 1999-жылы туулган Павелдин үстүнө бензин куюп, аны өрттөп жиберген. Бирок жабырлануучу качып чыгып, жалынга оролгон кийимин чечип, денесиндеги жалынды арыктагы суу менен өчүрүүгө жетишип, аман калган.
Ошол эле күнү Борис, Кирилл жана Илья Станислав аттуу кишини өзгөчө мыкаачылык менен сабап, отвертка менен денесин сайгылап, ага да бензин чачып, өрттөп жиберишкен. Кылмышты жашыруу үчүн адамдар сөөктү "Москвич-412" үлгүсүндөгү унаанын багажына жүктөп, дренаждык каналга алып барып, камыш менен жаап, ошол жерге ыргытышкан.
Беш күндөн кийин Борис 25-октябрда мас абалында Илья жана Кирилл менен бирге мурда качып кетүүгө үлгүргөн Павелди дагы өлтүрүүгө аракет кылышкан: алар аны дагы өзгөчө мыкаачылык менен сабап, андан соң бир канча жолу бычакташкан. Жабырлануучуну өлтүрдүк деп ойлоп, аны камыштын арасына ыргытаар алдында башын балта менен чапкылашкан. Денесин ыргыткан соң, окуя болгон жерден качып кетишкен. Бирок Павел өлгөн эмес. Ал жолдун аркы бетине чыгып, өтүп бара жаткан унааны токтотуп, Москва районунун аймактык ооруканасына жетип, дарыгерлер өз убагында медициналык жардам көрсөтүшкөн.
Мындан тышкары, Илья төмөндөгүлөр боюнча айыпталууда: 2018-жылдын 14-ноябрында анын үйү тинтүүгө алынган. Дивандагы матрацтын ичинен 32 грамм салмактагы кочкул жашыл түстөгү зат салынган желим баштык табылган. Соттук-химиялык экспертизанын корутундусуна ылайык, Ильянын үйүнөн табылган каражат баңгизат – кургатылган марихуана болуп саналат.
2019-жылдын 17-апрелинде Чүй облусунун Москва райондук соту төмөнкүдөй өкүм чыгарды:
- 1993-жылы туулган Борис адам өлтүрүү жана эки киши өлтүрүүгө аракет кылуу боюнча күнөөлүү деп табылып, 20 жылга эркинен ажыратылды. Ал жазаны өтөп жаткан жеринде аракечтиктен дарылоо курсунан да өтөт;
- Ушул эле беренелер боюнча 1994-жылы туулган Кирилл күнөөлүү деп табылган. Ал дагы 20 жылга эркинен ажыратылды;
- 1980-жылы туулган Илья адам өлтүрүү жана өлтүрүүгө аракет кылуу боюнча жана курал сактагандыгы үчүн 3 жылга эркинен ажыратылып, жалпы 17 жылга эркинен ажырады.
Ильяга карата өкүм Чүй облустук сотуна даттанылып, биринчи инстанциянын чечимин өзгөртүүсүз калтырган. 2023-жылдын 21-февралында Жогорку Сот райондук жана облустук соттордун чечимин күчүндө калтырган.
