Коргоо министрлигинин мурдагы кызматкери террористтик уюмду жактаганга шектелүүдө
УКМК тарабынан эл аралык террористтик уюмдун активдүү жактоочусу кармалды. Коопсуздук комитеттен кармалган жаран мурда Коргоо министрлигинин кызматкери болгон дешет.
Маалым болгондой, 27-мартта УКМКнын Жалал-Абад облусу боюнча башкы башкармалыгы тарабынан эл аралык террористтик уюмдун активдүү жактоочусу, 1995-жылы туулган Жалал-Абад шаарынын А.К. аттуу тургуну кармалды. Ал мурда Коргоо министрлигинин атайын бөлүмдөрүндө кызмат өтөгөн.
Кармалган жаран 2022-жылдын аягында Кыргызстандан чыгып кеткен. Ал уюм тарабында куралдуу кагылышууларга катышуу үчүн Сирия Араб Республикасына өтүп кетүүгө аракет кылган.
Бул факты боюнча 37-256-берененин 2-бөлүмү (Кылмыш жасоого аракеттенүү - Кыргыз Республикасынын жаранынын чет мамлекеттин аймагындагы куралдуу жаңжалдарга же согуш аракеттерине катышуусу же террордук актыны жасоо үчүн даярдыктан өтүүсү) боюнча кылмыш иши козголуп, тергөө абагына киргизилди. Учурда ыкчам иликтөө иш-чаралары уланууда.
