13 жаштагы кыз зордукталып, ал кийин өз жанын кыйган. Иш боюнча дагы үч милиция кармалды
Бишкектин Свердлов райондук ички иштер бөлүмүнүн дагы үч милиция кызматкери 13 жаштагы кыздын зордукталышы боюнча кармалды. Алардын бири убактылуу кармоочу жайга киргизилген. Бул тууралуу Kaktus.media сайтына укук коргоо органдарындагы өздүк булактар билдирди.
Алардын маалыматына ылайык, 6-апрелде Башкы прокуратуранын тергөөчүлөрү тарабынан Бишкек шаарынын Свердлов РИИБдин үч милиционери, тактап айтканда, жашы жете элек өспүрүмдөр менен иштөө боюнча 2 инспектор, ошондой эле бир тергөөчү кармалган. Акыркысы убактылуу кармоочу жайга киргизилип, кийин дароо үч укук коргоо органынын кызматкерлери күнөөсүн моюнга алуу келишимине кол коюшуп, убактылуу бошотулган.
Учурда тергөө иштери уланып жатканы белгилүү болду.
Эске салсак, 2022-жылдын апрель айында 13 жаштагы А.Ж. өз жанын кыйган. Анын агасы 2021-жылдын ноябрь айында Бишкек шаарынын Свердлов РИИБине кайрылган. Ал А.Ж.ны таап берүүнү суранып, үч күндөн кийин кыз табылган. Аны менен жыныстык катнашта болгон 21 жаштагы жигит менен жүргөнү белгилүү болгон. Бардык жагдайлар такталган соң кылмыштын аймагы боюнча иш Ленин РИИБге өткөрүлүп берилген.
Ленин райондук ички иштер бөлүмүндө жабырлануучу суракка алынып, кылмыш иши козголуп, экспертизалар дайындалган. Натыйжада кылмышка шектүү убактылуу кармоочу жайга киргизилбей, иш жабылган. Башкы прокуратура тарабынан Бишкектин Ленин РИИБинин тергөөчүлөрү менен эксперти баш калкалоо фактысы боюнча кармалган.
