1-июлдан тарта OСAГOсу жок юридикалык жак жана чет элдиктерге айып пул салынат
"Бүгүнкү күндө юридикалык жактар жана чет өлкөлүк жарандар үчүн ОСАГО камсыздандыруучу полиси жок болсо жоопкерчилик каралат", - деп билдирди бүгүн, 3-майда Финансы рыногун жөнгө салуу жана көзөмөлдөө мамлекеттик кызматынын төрагасынын орун басары Марат Пирназаров.
Анын айтымында, айыптын суммасы азырынча өзгөрө элек, бирок жеке жактар үчүн жоопкерчилик 2024-жылдын 1-январынан тарта башталат. Камсыздандыруу келишими бир жылга түзүлөт.
"Учурда эскертүү, алдын алуу иштери жүрүп жатат. 1-июлдан тарта толук жоопкерчилик болот", - деди Пирназаров.
Мамлекеттик финансылык көзөмөл органынын жетекчисинин орун басары ОСАГО камсыздандыруучу полисинин базалык ставкасын кайра карап чыгуу планы жок экенин, ал учурда 1680 сомду түзөрүн билдирди.
ОСАГОнун жоктугу үчүн айып 3 миң сом, юридикалык жактар үчүн 13 миң сом болот.
Жалпысынан 2023-жылдын апрелинен бери 21743 ОСАГО камсыздандыруучу полиси берилген. Камсыздандыруу менен 13 компания алектенет.
Өзгөртүүлөргө ылайык, 2023-жылдын 1-апрелинен тартып айдоочулар же төмөнкү транспорт каражаттарынын ээлери ыйгарым укуктуу мамлекеттик органдардын кызматкерлери тарабынан токтотулган учурда жарандык жоопкерчиликти милдеттүү камсыздандыруу келишимин да берүүгө милдеттүү:
- башка өлкөлөрдө катталган транспорт каражаттары;
- юридикалык жактардын, анын ичинде мамлекеттик органдардын жана өз алдынча башкаруу органдарынын менчигинде болгон транспорт каражаттары.
Белгиленгендей, 2024-жылдын 1-январынан тартып ыйгарым укуктуу мамлекеттик органдардын кызматкерлери токтоткондо Кыргыз Республикасынын мыйзамдарына ылайык, катталган автоунаалардын бардык айдоочулары ОСАГО боюнча документ көрсөтүшү керек.
