Япония Кыргызстанга атайын техника сатып алуу үчүн 6,7 миллион доллар бөлөт
Япониянын Эл аралык кызматташтык агенттиги (JICA) Кыргызстанга өлкөдөгү ирригациялык каналдарды тазалоо үчүн атайын техника сатып алуу үчүн 6,7 миллион доллар бөлөт. Бул тууралуу депутат Дастан Бекешев билдирди.
"Азырынча бизге берип жатышат... Бизге насыяларды, гранттарды беришет.
Япон эли дагы бир жолу JICA (Япониянын эл аралык кызматташтык агенттиги) аркылуу биздин өлкөгө сугат каналдарын тазалоо үчүн жер казуучу жана башка техникаларды алууга жардам берип жатат. 44 даана өлчөмүндө атайын техника. Акчалай алганда бул 1 миллиард 87 миллион япон иенине (6,7 миллион долларга жакын) барабар.
Бишкек шаарынын жылуулук менен камсыздоосун модернизациялоо үчүн Эл аралык өнүктүрүү ассоциациясынан 6,9 миллион доллар насыя сурап жатабыз. Биз 0% үстөк менен 50 жылга насыя алабыз. "Бишкекжылуулукборбору" ишканасына бул акча керек, анткени түтүктөрдүн 75%ы эскирип, жоготуу 25%ды түзөт.
Базар-Коргон шаарын таза суу менен камсыз кылуу үчүн 3 миллион 745 миң евро насыя, 4 миллион 795 евро грант катары ЕБРРден алып жатабыз. 1 миллион 50 миң евро кеңешчилерге (консультант) кетет. Насыя 15 жылга алынат, 4 жыл төлөөдөн бошотулат, бирок андан кийин төлөмдөр өзгөрүлмө чен боюнча пайыздарды төлөөдөн башталат. Акча алуу үчүн 1% бир жолку комиссиялар бар.
Бул макулдашуулар бюджеттик комитеттин жыйынында каралат.
Өзүмдүн атымдан белгилеп кетем, биз суу менен камсыздоо жана жылуулук жана электр энергиясы менен камсыздоонун инфраструктурасын жаңылоого барган сайын муктаж болуп жатабыз, анткени азыркы инфраструктура абдан эскирген", - деди депутат.
