Эксперттер Төмөнкү Ала-Арча суу сактагычы заң менен булганганын айтышты
Төмөнкү Ала-Арча суу сактагычында суунун булганышы жогорулаганы байкалууда. Бул тууралуу бүгүн, 30-июнда MoveGreen компаниясынын суу боюнча эксперти Медер Алиев "Суу, санитария жана коопсуздук" боюнча тегерек столдо билдирди.
Суунун сапатын аммонийден улам билсе болот. Бул заттын ашыкча болушу - суу заң менен булганганын көрсөтөт.
Ошондой эле Жаратылыш ресурстары, экология жана техникалык көзөмөл министрлигинин өкүлү Нурлан Шаршеев Төмөнкү Ала-Арча суу сактагычынын булганышына эмне себеп болгонун айтып берди.
"Дарыя калктуу конуштар, Бишкек аркылуу өтөт. Дарыяга коллектордук-дренаждык түйүндөр да кирет. Бишкектин төмөнкү аймактарындагы тургундар канализация түтүктөрүн коллектордук-дренаждык тармактарга буруп койгонун көрүп жатабыз. Ал эми коллектордук-дренаждык тармактар дарыяга, андан ары суу сактагычка куят", - деди ал.
Жыйынтыгында эксперттер Төмөнкү Ала-Арча суу сактагычынын булгануу маселесин республикалык деңгээлде чечүүнүн маанилүүлүгүн белгилешти.
