Садыр Жапаров көк бөрү боюнча клубдук командалар арасындагы Дүйнө биринчилигин расмий ачты
Садыр Жапаров бүгүн, 13-августта Бактуу-Долоноту айылындагы ат майданында көк бөрү боюнча клубдук командалар арасында биринчи дүйнөлүк чемпионатты ачты. Бул тууралуу президенттик аппараттан кабарлашты.
Өз сөзүндө мамлекет башчысы конокторду кыргыз жергесинде куттуктап жатып, бүгүн Кыргызстандын кооз берметинин жээгинде бардык адамдар катышкан мыкты оюнга күбө болуп жаткан спорт күйөрмандары үчүн өзгөчө күн экенин зор канааттануу менен белгиледи.
Президент белгилегендей, көк бөрү – кыргыздардын эң байыркы улуттук оюндарынын бири, аны эл арасында эң эр жүрөк атчандардын оюну деп аташат. Оюн эрдикти, эпчилдикти жана укмуштуудай күчтү талап кылат. Көк бөрү ойногон жигиттер эрктүү, өлкөнү коргоого даяр жоокерлер болуп чоңоюшат. Көк бөрү оюну жаштарды команда болуп иштөөгө, керек учурда тез чечим чыгарууга, сабырдуулукка үйрөтөт.
Мүмкүнчүлүктөн пайдаланып, Садыр Жапаров бул оюндун кеңири жайылышына салым кошкон ар бир адамга, ошондой эле анын күйөрмандарына ыраазычылык билдирди.
"Бүгүнкү күндүн башкы талабы - калктын калың катмарында адеп-ахлактык тарбиянын бийик принциптерин калыптандыруу. Тактап айтканда, спортко жана дене тарбияга сүйүү менен сергек жашоого кызыгууну калыптандыруу, кулк-мүнөздү калыптандыруу жана ар кандай турмуштук кыйынчылыктарды жеңүүнү үйрөтүү. Бул жагдайдын маанилүүлүгүн эске алып, мамлекет башчысы катары мен биринчи кезекте "Инсандын руханий-адептик өнүгүүсү жана дене тарбиясы жөнүндө" биринчи жарлыкка кол койдум. Бүгүнкү күндө улуттун саламаттыгы приоритеттүү багыттардын бири болуп саналат. Күчтүү Кыргызстанды куруу үчүн өлкөдө дени сак, эрктүү, мекенчил жаштар өсүш керек!" - деп Садыр Жапаров баса белгиледи.
