"Сүрөттөрүңдү таратам". Ошто 25 жаштагы кыздан iPhone 14 талап кылган келин кармалды

Ошто 25 жаштагы кызды шантаж кылып, iPhone 14 Pro Max талап кылганга шектүү кармалды. Маалыматты Ош ШИИБден кабарлашты.

Белгилүү болгондой, Сулайман-Тоо милиция бөлүмүнө Ош шаарынын 25 жаштагы тургуну арыз менен кайрылган. Ал белгисиз аял анын намысына, жүрүм-турумуна шек келтирген сөздөр менен сүрөттөрүн интернетке чыгарам деп курулай доомат коюп iPhone 14 Pro Max же анын акчасын талап кылып жаткандыгын билдирген.

Бул арыздын негизинде 208-беренеси (опузалап талап кылуу) менен кылмыш иши козголуп, тергөө иштери башталган. 9-сентябрда шектүү 60 миӊ сом акча алып жаткан учурда кармалган. Ал коңшу мамлекеттин жараны, Ош шаарында убактылуу жашаган 1998-жылы туулган Ш.И. аттуу келин экендиги аныкталды. Кармалган келин Ош шаардык соту тарабынан 2 айга камакка алынды.

Учурда тергөө амалдары улантылып жатат.