Пляждарда бүркүт, кыргый көтөрүп сүрөткө түшүү кызматын көрсөткөндөргө айып салынды
Ысык-Көлдөгү пляждарда суу аттракциондорун жана жапайы жаратылышты коргоону көзөмөлдөө боюнча рейддик иш-чаралар жүрүүдө. Облустук милициядан белгилешкендей, рейддин жүрүшүндө тийиштүү уруксат берүүчү документтерге, көрсөтүлгөн кызматтардын техникалык абалына жана коопсуздугуна өзгөчө көңүл бурулду.
"Бүркүт жана шумкар сыяктуу жапайы канаттуулар менен сүрөткө түшүү боюнча мыйзамсыз факты аныкталды. Рейддин жүрүшүндө кооптуу абалда турган 10 бүркүт жана 3 кыргый алынган. Жапайы канаттуулар менен сүрөткө түшүү Кыргыз Республикасынын мыйзамына каршы келет жана кооптуу болуп саналат", - дешет милициядан.
Канаттуулардын ээлерине карата мамлекеттик экологиялык жана техникалык коопсуздук кызматкерлери тарабынан протоколдор түзүлүп, айып пул салынат. Алынган канаттуулар Каракол шаарындагы зоопаркка өткөрүлүп берилет, бул аларды коргоону жана калыбына келтирүүнү камсыз кылары маалым болду.
