Базар-Коргондо дарыгердик борбордун бөлүм башчысы пара талап кылганга шектелди
Жалал-Абад облусунда Саламаттыкты сактоо министрлигинин бөлүм башчысы системалуу түрдө пара талап кылганга шектелди. УКМКдан маалымдашкандай, Базар-Коргон районунун тургундарынан бир нече жолу даттануулар жана кайрылуулар түшкөн.
Буга байланыштуу "Пара алуу" беренеси менен кылмыш иши козголгон.
"25-сентябрда Базар-Коргон райондук жалпы дарыгерлик практика борборунун А.З.Ж. аттуу бөлүм башчысы кармалды. Ал эмгекке жарамсыздык баракчасын (ооруканалык) бергендиги үчүн, ошондой эле майыптыгынын тобун аныктоодо медициналык-социалдык эксперттик комиссиянын оң корутундусун тездеткендиги үчүн жарандардан системалуу түрдө опузалап акча алгандыгы аныкталган. Анын мыйзамсыз аракеттери сот органдарынын уруксаты менен жашыруун камерага жаздырылган", - дешет комитеттен.
Учурда кармалган жаранга карата жана башка кызмат адамдарынын ушул сыяктуу кылмыштарга катыштыгы бар экендигин аныктоо максатында тергөө ыкчам иш-чаралары жүргүзүлүүдө.
