Эки жигит 67 жаштагы кишини өлтүрөбүз деп коркутуп анын ыйлаганын видеого тартып алышкан
Кочкор районунда эки жигит майып адамды шылдыңдап, өлтүрөм деп коркутушкан. Анын видеосу социалдык тармактардын кыргыз сегментинде тарап кетти.
Видеодо 50 жаштан ашкан белгисиз адам апалап ыйлап жатканын көрүүгө болот. Кары киши видеого тартып жаткан белгисиз жаштардан аны кое берүүнү суранат.
Жаштар, башына баштык кийгизип өлтүрөбүз деп коркутушканын, тоого же көрүстөнгө көмүп салабыз дегенин көрүүгө болот.
Kaktus.media коркутууга кабылган адамдын карындашы Айнура Мамытова менен байланышты.
"Видеодо 1955-жылы туулган менин агам Абдыжапар Мамытов, башкача айтканда, ал 67 жашта. Менин агам бала кезинен бери экинчи топтогу майып. Кочкордо аны дээрлик бардыгы билишет", - деди жабырлануучунун карындашы.
Анын айтымында, ошол күнү бир тууган агасы, адаттагыдай эле, сейилдөөгө сыртка чыккан. Ал жерден белгисиз адамдар күч колдонуп унаага салып кетишкен. "Видеодо Абдыжапар кыйкырып, апасын чакырып жатат, башкача айтканда, ал мени чакырып жатат карындашы болсом дагы, мага апа деп кайрылат. Ал бардыгын жашына карабай байке, эже деп атайт. Өмүр бою менин жанымда, ошондуктан мени апасы деп ойлойт, - деди Мамытова түшүндүрүп жатып.
Ал агасын Кочкордун борборунан эки жаш жигит алып кеткенин кошумчалады. Алар болгону 23-25 жаштагы жапжаш жигиттер.
"Бул шылуундардын ата-энелери бизге келип, кечирим сурашкан. Бирок мен аларды кечирбейм. Агамдын майып экендигин билип, аны шылдыңдашты. Билишимче, алардын бири азыр милицияда, бирөөсү качып жүрөт. Агам түнү бою тиги жигиттер аны өлтүрүп кетет экен деп, коркуп уктай албай чыкты ", - деп билдирди Мамытова өз сөзүндө.
Нарын облусунун Ички иштер башкармалыгы социалдык тармактарда видеосу тараган адамга коркутуу фактысы боюнча териштирүү башталгандыгын билдирди. Толук маалыматты жакынкы аралыкта жарыялайбыз деп убада кылышты.
