Чек ара чатагы. Рахмон менен жолугушуудан кийин Жапаровдун комментарийи
"Биз бардык чек ара маселелерин чечүү боюнча мындан аркы кадамдарды белгиледик жана кыргыз-тажик мамлекеттик чек арасынын сызыгын сүрөттөө боюнча ишти жигердүү улантууда" деди Кыргыз Республикасынын Президенти Садыр Жапаров кечээ, 29-июнда болгон сүйлөшүүлөрдүн жыйынтыгы боюнча жалпыга маалымдоо каражаттарына жасаган билдирүүсүндө.
Мамлекет башчысы Кыргызстан Тажикстан менен көп кырдуу мамилелерди өнүктүрүүгө артыкчылыктуу маани берерин жана тышкы саясатында достукка жана жакшы коңшулаштыкка негизделген өз ара пайдалуу өнөктөштүктү бекемдөө жаатында буга чейин жетишилген бардык келишимдерге берилгендигин билдирди.
Садыр Жапаров билдиргендей, сүйлөшүүлөрдүн жүрүшүндө кыргыз-тажик мамлекеттик чек арасын делимитациялоо жана демаркациялоо боюнча маанилүү пикир алмашуу болду. Мындан тышкары, аймактык коопсуздук жана суу-энергетика тармагындагы кызматташтыкты чыңдоо маселелери талкууланды.
Мамлекет башчысы жакынкы аралыкта Бишкекте өтө турган өкмөттөр аралык комиссиянын 17-отурумунун жүрүшүндө тараптар натыйжалуу жана жемиштүү иш алып барышаарына ишеним билдирди. Бул платформа ошондой эле пайда болуп жаткан соода-экономикалык кызматташтык маселелерин ыкчам чечүүгө мүмкүнчүлүк берет.
Садыр Жапаров Кыргызстан менен Тажикстан үчүн эки мамлекеттин элдеринин ортосундагы ишенимди бекемдөө, айрыкча чек ара аймагында өзгөчө маанилүү экендигин баса белгиледи.
Буга байланыштуу, тараптар чек ара аймактарындагы коопсуздукту жана туруктуулукту камсыздоо, жергиликтүү калк арасында улут аралык кастыкты козутууга багытталган ар кандай деструктивдүү аракеттерди басуу боюнча ишти күчөтүү жөнүндө макулдашышты. Кыргыз тарап чек арадагы айылдарда жашаган эки тараптын аксакалдарынан турган тынчтыкты орнотуу комиссиясын түзүү демилгеси менен чыгып, мүмкүн болгон чыр-чатактарды алдын алуу керектигин билдирди.
"Биз эки мамлекеттин элдеринин гүлдөп өнүгүшү үчүн эки тараптуу кызматташуунун бардык тармактарында эки тараптуу кызматташтыктын потенциалын өркүндөтүүгө ниеттенебиз", - деп жыйынтыктады Садыр Жапаров.
