Кылмыштуу топтун мүчөсү батирдин ээсин алдоо үчүн килемди өрттөп ийген. Анан бычак такаган
Чүй облусунун аймагында каракчылыкка шектүү адам кармалды. Бул тууралуу Ички иштер министрлигинин басма сөз кызматы билдирди.
Маалым болгондой, июнь айында Токмак милициясына 35 жаштагы жергиликтүү тургунду тоноп кетти деген билдирүү түшкөн.
Көрсө, түн ичинде шаардагы көп кабаттуу үйлөрдүн биринде белгисиз адам жабырлануучунун эшигинин алдында резина килемди өрттөп жиберген. Түтүндүн айынан эшикти ачып, сыртка чыкканда тамагына бычак такалган. Ууру батирге кирип, акча уурдап, качып кеткен.
Бул факт Кылмыштардын жана жоруктардын бирдиктүү реестрине катталып, Кыргыз Республикасынын Кылмыш-жаза кодексинин "Каракчылык" беренеси боюнча сотко чейинки өндүрүш башталды. Уюшкан кылмыштуу топтун мүчөсү катары 30 жаштагы шектүү кармалган. Мурда соттолгон. Шектүү убактылуу кармоочу жайга киргизилди.
