Өкмөттүн ыйгарым укуктуу өкүлдөрү жоюлат. Эми губернаторлор президентке баш ийишет(жарлык)
Президент Садыр Жапаров "Кыргыз Республикасынын Президентинин облустагы ыйгарым укуктуу өкүлү жөнүндө" жарлыкка кол койду. Бул тууралуу президенттик аппараттын маалыматтык саясат бөлүмү билдирди.
Белгиленгендей, натыйжалуу мамлекеттик башкарууну камсыз кылуу, аймактарда мамлекеттик саясатты жүргүзүү, мамлекеттик органдардын жана жергиликтүү өз алдынча башкаруу органдарынын ишин координациялоо максатында, Кыргыз Республикасынын Конституциясынын 71-беренесин жетекчиликке алуу менен региондордогу Кыргыз Республикасынын Өкмөтүнүн ыйгарым укуктуу өкүлдөрүнүн институту, Кыргыз Республикасынын Президентинин облустардагы ыйгарым укуктуу өкүлдөрүнүн институту болду.
Кыргыз Республикасынын Президентинин облустагы ыйгарым укуктуу өкүлү жөнүндө жобого ылайык, Ыйгарым укуктуу өкүл түздөн-түз президентке жана министрлер кабинетинин төрагасына баш иет жана отчет берет.
Бекитилди:
- Кыргыз Республикасынын Президентинин облустагы ыйгарым укуктуу өкүлү жөнүндө жобо 1-тиркемеге ылайык;
- Кыргыз Республикасынын Президентинин облустагы ыйгарым укуктуу өкүлүнүн аппаратынын курамы жөнүндө типтүү жобо 2-тиркемеге ылайык.
Кыргыз Республикасынын Министрлер Кабинети белгиленген тартипте:
- бир айлык мөөнөттө Кыргыз Республикасынын Президентинин аймактардагы ыйгарым укуктуу өкүлдөрүнүн аппараттарынын түзүмдөрүн жана штаттык столдорун бекитсин;
- эки айдын ичинде өз чечимдерин ушул жарлыктын жоболоруна ылайык келтирсин;
- ушул жарлыктан келип чыккан башка чараларды көрсүн.
Кыргыз Республикасынын Президентинин облустардагы ыйгарым укуктуу өкүлдөрү эки айдын ичинде, Кыргыз Республикасынын Президентинин Аймактагы Ыйгарым укуктуу өкүлүнүн аппаратынын иш-аракеттери жөнүндө типтүү жобонун негизинде, Иш башкармалыгы жөнүндө жобону иштеп чыгышат жана бекитишет.
Бул жарлыкты ишке ашыруу тийиштүү жылга жана кийинки жылдарга республикалык бюджетте Кыргыз Республикасынын Өкмөтүнүн облустардагы ыйгарым укуктуу өкүлдөрүнүн аппараттарына каралган штаттык бирдиктердин жана каражаттардын чегинде жүзөгө ашырылаары белгиленсин.
Жарлык расмий жарыялангандан 7 күндөн кийин күчүнө кирет.
Документтерди жүктөө аркылуу президенттин өкүлүнүн кеңсеси жана аймактагы президенттин ыйгарым укуктуу өкүлү жөнүндө жобо менен тааныша аласыз.
