Коррупция боюнча соттолгон бажы башчысынын экс-орун басары Ражабалиев шайлоого барат
Түштүк-Батыш бажысынын мурдагы башчысы, Мамлекеттик бажы кызматынын төрагасынын экс-орун басары Нурлан Ражабалиев Баткен районунун №2 округуна талапкер катары катышууну чечкен.
Эске салсак, Райымбек Матраимовдун схемаларына байланыштуу эки кылмыш иши сотко жөнөтүлүп, УКМК бажы кызматкерлери Нурлан Ражабалиев менен Абдыбахаб Боронбаевди иликтеген. Аларга Кылмыш кодексинин "Коррупция" беренеси боюнча айып тагылган.
Айрым маалыматтарга караганда, Матраимовдун схемасында биринчилерден болуп Ражабалиев менен Боронбаев бар экенин тастыкташкан. Алар импорттоочулардын бажы төлөмдөрүн азыраак төлөп, товардын наркын түшүрүү үчүн жооптуу болушкан.
Экөө тең тергөө менен кызматташуу боюнча келишимге кол коюп, мамлекетке 14 миллион сомдук зыянды кайтарып беришкен.
Бишкек шаарынын Биринчи Май райондук соту Ражабалиевди "Коррупция" беренеси боюнча күнөөлүү деп таап, 260 миң сом айыпка жыкты.
