Токтайым Үмөталиева эмнеге Аскар Акаевди кучактаганын айтып берди
Депутаттыкка талапкерлердин теледебатында көрүүчү "Жашасын Кыргызстан" партиясынын лидери Токтайым Үмөталиевадан "Аскар Акаевди УКМКнын жанынан кучактап алганыңызда эмне деди эле?" деген суроо берди..
Ошондой эле Аскар Акаевдин Кумтөр маселесиндеги ролу кандай, анын аракеттери Centerra Gold менен пайдасыз келишимдердин алгачкы кадамдары деп эсептейби, же жокпу, деп сурады.
Үмөталиева биринчи президентке салам айтып, анан сөзүн улантты.
"Ал иштеп чыккан нерселердин баары бизде азыр да колдонулуп жатат. Кумтөр боюнча көрсөтмө берип кетти. Эми аны тергөөнүн жыйынтыгы көрсөтөт. Ошол мезгилде биз комплекстүү өнүгүүнүн алкактык программасын түзүп, анын алкагында өлкөгө 1,5 миллиард доллар тартылган. Калганын дагы эле алып жатабыз. Мен аны кучактап алганыма келсек, жаштыгым чындап эле анын тушунда өттү. Мени көрсөтпөгөн экинчи бөлүгүндө ал жөн гана: "Ай Данек, сени көргөнүмө кубанычтамын" деп айтты. Мен көп жылдан бери гезитимди ушул ат менен чыгарып келем", - деди ал.
