Милиционер 19 жаштагы кызды зордуктап, ага үйлөнүүнү убада кылган
Kaktus.media сайтына 19 жаштагы Канышай Хамитжан кызы кайрылып, Ош шаардык ички иштер башкармалыгынын аракетсиздигине нааразы болгон.
Кыздын айтымында, октябрдын башында достору менен Араван районунда жайгашкан ресторан-барга барган. Жабырлануучу официанттар алдап кеткендиктен эсепти жабууга акчасы жетпей калганын айтууда. Буга байланыштуу коноктор менен администрациянын ортосунда түшүнбөстүктөр болгон.
Окуя болгон жерге Ош ОИИБдин Патрулдук милиция кызматынын бөлүм кызматкерлери барышкан. Алардын арасында 1996-жылы туулган Мухаммед Алтыкеев да бар.
"Милицияга баарын түшүндүрдүк, андан кийин баары кетишти. Мухаммед менин номеримди сурап калды. Мага жаккан. Телефон чалганына каршы болгон жокмун. Биз баарлашып, жолуга баштадык", - деди жабырлануучу.
Кыз белгилегендей, октябрь айынын ортосунда Мухаммед Алтыкеев аны КХБК аймагындагы мейманканага алып келген.
"Ал менин кыз экенимди билип, тийбейм деп сөз берген. Бирок, каршылык көрсөткөнүмө карабай мени зордуктады. Мухаммед ошол эле түнү мага үйлөнөм деп убада берип, эртеси Жалал-Абадга үйгө жөнөттү", - деп түшүндүрдү Канышай.
Хамитжан кызы кошумчалагандай, Жалал-Абадга кетер алдында жигит эжеси менен тааныштырып, артымдан "кууп келүүгө" убада беришкен.
"Мен Мухаммедден эч качан мындайды күткөн эмесмин. Ошко кайтып келе жатып, РИИБге арыз жаздым. Ошол эле күнү Ош шаарынын борборундагы жөө адамдар өтүүчү жерден өтүп бара жатканымда белгисиз бирөө мени унаа менен сүзүп кетти. Мени ооруканага жаткырышты. Милиция кызматкерлери бүгүнкү күнгө чейин айдоочуну таппай коюшту", - деди жабырлануучу.
Кыз ооруканада жаткан учурда ага Мухаммеддин жакындары жана тааныштары келип, алгач акча сунуштап, андан соң коркутууга өтүшкөн.
"Ооруканадан чыккандан кийин мени Мухаммеддин эжеси жолугушууга чакырып, акча сунуштады. Мен макул болгон жокмун. Ошол эле учурда ал мени өлтүрөм деп коркутту", - дейт Канышай Хамитжан кызы.
Кыздын жактоочусунун айтымында, анын кардарынын зордуктоо иши жабылган.
"Зордуктоо боюнча иш жабылды. 27-ноябрда белгисиз бирөө аны унаасы менен сүзүп кеткен. Прокуратурага ишти токтотуу боюнча токтомдун жокко чыгарылгандыгы боюнча арыз түшкөн", - деп түшүндүрдү адвокат.
