Жогорку сот судьялар 160 миң айлык алат деген маалымат боюнча комментарий берди
Финансы министрлиги судьялар 160 миң сом айлык алат деген маалыматты жарыялаган.
Жогорку сот бул боюнча комментарий берип, бул көрсөткүчтөр реалдуулуктан өтө алыс деп билдирди.
"Жалпыга маалымдоо каражаттарында судьялардын болжолдуу маянасы 160 миң сомду түзөт деген маалымат кеңири тараганына байланыштуу Кыргыз Республикасынын Жогорку соту төмөндөгүлөрдү тактоо зарыл деп эсептейт: 2021-жылдын 1-июлунан тарта эмгек акы жогорулагандан кийин судьялардын маянасы инстанцияларга жараша 46 миң сомдон 51 миң сомго чейин жетет. Эмгек акыга ар кандай кошумча акылар белгиленет, мисалы, эмгек стажы, квалификациялык класс, белгилүү бир чектөөлөр болгон иштерди кароо, бийик тоолуу шарттарда иштөө ж.б.
Райондук сотто оклад 46 миң сом болсо, облустук сотто 49 миң сом, Жогорку сотто 51 миң сомду түзөт. Иш стажы боюнча үстөк акы ар бир судьянын иш стажына жараша 5%дан 40%га чейин болот.
Судьялардын канча маяна алып жатканын ачык булактардан тапса болот, деп Жогорку сот белгиледи.
Эске салсак, буга чейин Финансы министрлиги президенттин буйругун ишке ашырып, судьялардын айлыктары 81 миң сомдон 160 миң сомго көтөрүлдү, деген маалыматты тараткан.
"Келаткан жылы Финансы министрлиги көптөгөн ийгиликтерге жетишип, айлык акыны көтөрүү процесси сот системасындагы бардык кызматкерлерге тиешелүу болот, деп Жогорку сот ишенет", - деп билдирүүдө жазылган.
