Дем алыш күндөрү асман тиреген үйдөй эки астероид Жерге жакындайт. Коркунуч туудурбайбы?
Ушул дем алыш күндөрү, 30-31-июлда асман тиреген эки астероид Жерге жакындайт. Бул туралуу Moi-portal кабарлады.
2016 CZ31 деп аталган биринчи астероид 30-июль, ишемби күнү учуп өтөт. Маалыматка караганда, ал 55 618 км/саат ылдамдыкта жүрөт. Астрономдор бул космос объектисинин туурасы болжол менен 122 метрге барабар экенин жана аны 40 кабаттуу имаратка салыштырууга болот деп билдирди.
Астероид биздин планетадан 2 800 000 километр алыстыкта өтөт, бул Жер менен Айдын ортосундагы орточо аралыктан жети эсе көп. Бул космостук таш планетага бир нече жыл сайын жакындайт, изилдөөчүлөргө караганда кийинкиси 2028-жылдын январына туура келет.
2013 CU83 деп аталган экинчи астероид андан да чоң. Ал 31-июлда, жекшемби күнү учуп өтөт. Анын диаметри болжол менен 183 метр жана Жерден болжол менен 6 960 000 км алыстыкта учат, бул Жер менен Айдын ортосундагы орточо аралыктан болжол менен 18 эсе көп. Бул объект 21168 км/саат ылдамдыкта жүрөт.
НАСА жана башка космостук агенттиктер байкоо салып турушат. Астероиддер алыс болсо да, анын орбитасы планета сыяктуу чоңураак объекттин тартылуу күчү менен өз ара аракеттенгенден кийин бир аз жылып кетиши мүмкүн деген өтө кичинекей мүмкүнчүлүк бар. Белгилей кетсек, мындай жылышуу келечектеги учуу учурунда Жер менен астероиддин кагылышына алып келиши мүмкүн.
