Нарында токойчу пара алууга шектелип кармалды. Ал мурда дагы жоопко тартылган
Нарын облусунун Ат-Башы районунун токой чарбасынын кызматкери пара алууга шектелип кармалды. УКМКнын маалымат кызматынан белгилешкендей, кызматкер акча алып жатканда колго түшүрүлгөн.
Белгилүү болгондой, 28-февралда 10 000 сом өлчөмүндө акча каражатын алуу учурунда Ат-Башы районунун токой чарбасынын жумушчусу Б.А.С. кармалды. Ал буга чейин да ушундай эле аракети үчүн жоопко тартылган.
2015-жылдан 2018-жылга чейин "АКНК" (Коррупцияга каршы элдик көзөмөл) коомдук уюмунун активдүү мүчөсү болгон.
Б.А.С. узак убакыттан бери А.А.А. аттуу жаранды мурда жумушка орноштургандыгы үчүн коркутуп-үркүтүп жана шантаж жолу менен акча талап кылып жүргөн. Ага башка жакка кетпөө жөнүндө бөгөт коюу чарасы коюлду. Учурда керектүү тергөө-ыкчам иш-чаралары жүргүзүлүүдө.
