"Чек талап кылып - байге утуп ал" лотереясы кайра жанданат. Быйыл он батир ойнотулат
Мамлекеттик салык кызматы "Чек талап кылып – байгени утуп ал!" лотереясын жаңы шарттар менен кайра улантат. Бул тууралуу аталган мекеменин басма сөз кызматынан билдиришти.
Биринчи оюн 1-июлда, экинчиси 30-декабрда өткөрүлөт. 2023-жылдагы лотереянын байге фонду 2000ден ашык баалуу байгелерден турат. Алардын арасында 10 батир, 20 электромобиль бар.
Лотереяга катышуу үчүн "Салык чек" мобилдик тиркемесин жүктөп алып, катталуу жетиштүү. Салык чек тиркемесин колдонуучу болгондор үчүн тиркемени жаңылоо зарыл.
Ар бир товарды сатып алуу же кызматтарды алууда ККМден накталай дүмүрчөктөрдү талап кылыңыз. Андан кийин мобилдик колдонмонун сканери менен кассирдин квитанциясынын QR кодун сканерлеңиз.
Салык кызматы жарандарды лотереяга активдүү катышууга чакырат.
"Бул ишкерлердин кассалык машиналарды колдонуусуна коомдук көзөмөлдү гана камсыз кылбастан, баалуу байгелердин ээси болууга да шарт түзөт", - деп айтылат маалыматта.
