Акжол Махмудов Власов менен болгон беттеш тууралуу: Биз болуп көрбөгөндөй күрөш көрсөтөбүз
"Эң негизгиси, мен татыктуу жана чыныгы мырзалык күрөш көрсөткүм келет", - деди Акжол Махмудов бүгүн, 26-апрелде Алматыда (Казакстан) өтө турган PWL турниринин алдындагы маалымат жыйынында.
Белгилей кетсек, дүйнөнүн учурдагы чемпиону, Олимпиаданын күмүш байгесинин ээси Акжол Махмудов менен Олимпиаданын эки жолку, дүйнөнүн үч жолку чемпиону, PWL боюнча чемпион Роман Власовдун беттеши эл аралык лигадагы турнирдин башкы оюну болмокчу.
Махмудов өз сөзүндө уюштуруучуларга өзүн көрсөтүү мүмкүнчүлүгү үчүн ыраазычылык билдирди.
"Менден талап кылынгандардын баарын аткардым, эми беттештин көрүүчүлөрү күткөн татыктуу күрөштү көрсөтүү калды. Мен бүйүр кызыткан, мыкты беттеш көрсөтөбүз деп ойлойм", - деди ал.
Ал эми Роман Власов белгилегендей, ал акыркы Олимпиада оюндарында күрөшкөн эмес, ошондуктан Махмудов менен беттешүүнү каалаган. Анткени ал буга чейин оюндарга катышкан көптөгөн күчтүү балбандар менен жолугушкан.
"Акжол менен болгон тирешүү тарыхта калат деп ишенем, жеңиш үчүн баарын жасайм", - деп кошумчалады ал.
Белгилей кетсек, Акжол Махмудов менен Роман Власов бул турнирдин алкагында интервью беришкен. Махмудов өзүнүн интервьюсунда Власовдон дайыма үлгү алгандыгын айтты.
"Мен Роман менен көптөн бери таанышмын. Ал абдан жакшы, тарбиялуу адам. Ал наамы бар балбандардын бири. Андан дайыма үлгү алам", - деди кыргыз балбаны.
Өз кезегинде Власов Махмудов спорттун бул түрүн өзүнүн күрөшү менен кооздоп жатканын баса белгиледи.
"Акжолдун күрөшүнүн стили абдан ачык. Ал эркин күрөшөт. Кооз күрөш тартуулап, дүйнө чемпиону болду. Мен үчүн бул жолугушуу мыкты формада экенимди көргөзө турган чоң чакырык", - деп белгиледи россиялык балбан.
