Шайназаров: Добуш сатып алуу боюнча Ниязалиеваны жоопко тартууга уруксатты БШК берет
№26 Ленин бир мандаттуу шайлоо округу боюнча депутатты мөөнөтүнөн мурда шайлоодо шайлоочуларды сатып алуу фактысы боюнча Ленин райондук ички иштер бөлүмүнүн кызматкерлери кылмыш ишин козгоду. Анын жыйынтыгы Борбордук шайлоо комиссиясынын жыйынында каралат. Бул тууралуу Kaktus.media сайтына БШКнын төрагасынын орун басары Тынчтык Шайназаров билдирди.
Анын айтымында, Борбордук шайлоо комиссиясынын мүчөлөрү козголгон иштин алкагында талапкерди жоопкерчиликке тартууга макулдук берүү маселесин карашы үчүн тергөө тез арада бүтүшү керек.
"Ошол эле учурда кызыкдар тараптар БШКнын чечимин сотто талаша алышат. Бирок 11-июнга чейин шайлоонун жыйынтыгы чыгарылып калышы толук ыктымал", - деди Шайназаров.
Эске салсак, 28-майда №26 Ленин бир мандаттуу шайлоо округу боюнча Жогорку Кеңештин депутаттыгына кезексиз шайлоо өтүп, анда алдын ала маалыматтар боюнча көпчүлүк добушту (35,83%) Дамира Ниязалиева жеңип алган. Ал шайлоочуларды сатып алган деп шектелүүдө. Буга телефон сүйлөшүүлөрүн жаздыруу негиз болгон. Аудио жазууда болжолдуу түрдө депутаттыкка талапкер Ниязалиев мүмкүн болгон агитатор У.Р. менен болгон баарлашууда үгүт иштерин жүргүзүү, көрсөтүлгөн талапкерди колдоо үчүн добуш берүү үчүн акы төлөө маселелерин, Ниязалиеваны колдоого шайлоочуларды тартуу боюнча иштөө схемаларын талкуулаган. Бишкектин Ленин райондук ички иштер башкармалыгынын кызматкерлери штабды тинтүүгө алышкан. Ал жерден эч нерсе табылган эмес. Ниязалиева шайлоочуларды сатып алуу боюнча айтылгандарды четке какты.
