"Вагнерчилер" Ростов-на-Донуга киргенде куралдарын таштаган аскерлер камалууда
Россиялык журналист Анастасия Кашеварова "Вагнер" жеке аскердик компаниясынын согушкерлери Ростов-на-Донудагы Түштүк аскер округунун штаб-квартирасына келгенде куралын таштаган аскерлердин кармалышы тууралуу айтып берди. Бул тууралуу Варламов жаңылыктары Telegram каналында маалымдалды.
Анда кармалып жаткан аскерлер мамлекетке чыккынчылык кылгандар деп айыпталууда. Бирок аскерлерге курал таштоо буйругун айрым полковниктер берген.
"Аскер бийликтери, "вагнерчилер" штабга алып жатышканда Түштүк аскер округунун жогорку органдарынын куралын таштоо буйругуна баш ийген жигиттерди коё бергиле. Кээ бир полковниктер түштүк аскер округунун штабында отурган жигиттерге "Куралды таштагыла!" деп айтышкан. Азыр бул жигиттердин айрымдары камалып, буйрукту аткарганы менен мамлекетке чыккынчылык кылды деп айыпталууда. Бирок алар буйрук болбогондо коргонуу позициясынан таймак эмес", - деп айтылат журналисттин билдирүүсүндө.
Эске салсак, 24-июнда Пригожин артка чегингенде Россия бийлиги ага кылмыш ишин козгоо токтотулары, "Вагнерчилердин" тобунда жүргөн жалданма аскерлер кааласа Россиянын Федералдык коргоо органдары менен келишим түзсө болору айтылган эле.
