Бир үй-бүлө мүчөлөрүнүн өлүмү. Прокурор окуянын чоо-жайын айтып берди
Бүгүн, 11-июлда Бишкектин Октябрь райондук соту үч адамды (келин жана анын кызы менен баласы) өлтүрүү фактысы боюнча кылмыш ишин карады.
Сот залында мамлекеттик айыптоочу айыпты окуп берди.
"Чынтемир Аширалиев А.К. менен 2010-жылы банктан таанышкан. Экөө тең Баткен облусунан - жердеш болгондуктан банктан акча алып жүргөн. 2012-жылы алар Ысык-Көлдө кокустан жолугушуп, мамилеси сүйүүгө айланып кеткен. Ошол эле учурда Аширалиевдин аялы жана балдары болгон.
Алардын мамилеси көпкө чейин уланган. А.К. 2014-жылы Аширалиевден уул төрөгөн. Андан соң аял өзү жана бала тууралуу чындыкты аялына айта турганын айта баштаган. Мындан тышкары ал көңүл бурууну талап кылган".
Айыптоочу тараптын айтымында, Аширалиев бардык үй-бүлө мүчөлөрүн, анын ичинде кичинекей уулун өлтүрүүнү пландай баштаган. Ал ошондой эле мүмкүн болгон чындыктын ачылышы анын саясий карьерасына тоскоол болот деп чочулаган.
"2023-жылдын 15-февралында ал А.К.нын үйүнө барып, үй-бүлө мүчөлөрүн күтүп, алгач аялды муунтуп өлтүрүп, андан соң бычак сайган. Ошол учурда уулу бөлмөдө уктап жаткан. Жанына барып баланы жаздык менен муунтуп өлтүргөн.
Ал эми келиндин 2005-жылы туулган С.Т. аттуу кызы батирдин терезесинен секирип кеткен. Муну көргөн Ашыралиев анын артынан сыртка чыгып, кайра батирге алып келип, ваннага чөктүргөн.
Аширалиев өзүнүн кылмышын жашырууга аракет кылып, апасы менен кызынын ортосунда жаңжал болуп, кызы өз жанын кыйып, андан тышкары инисин муунтуп өлтүргөндөй сценарий жасаган.
Кылмыш жасалган учурда Аширалиевдин акыл-эси жайында болгон жана жасаган иштери үчүн толук жооп берген, ал мас эмес болгон", - деди прокурор.
Эске салсак, 16-февраль күнү саат 21:00 чамасында Бишкектин 5-кичи районунан үч адамдын жансыз денеси табылган. Окуя болгон жерге барган ыкчам топ аял, кыз жана бала каза болгонун аныкташкан. Эртеси милиция кызматкерлери үрөй учурган кылмышка шектүүнү кармашкан.
