Кызыл-Кыяда жолбун ит 8 адамды тиштеп салган. Аларга кутурмага каршы эмдөө дайындалды
Баткен облусунун Кызыл-Кыя шаарында жолбун ит тиштеп алган сегиз бейтап ооруканага жаткырылды. Буул тууралуу Саламаттыкты сактоо министрлиги маалымдады.
"Эпидемиологиялык иликтөө иштеринин натыйжасында Кызыл-Кыя шаарынын 8 тургунун 1 белгисиз ит тиштеп алганы аныкталган. Ит табылып жок кылынды. Баткендеги ветеринардык лабораторияга кийинки изилдөө үчүн патологиялык материал (иттин мээси) алынды. Ошондой эле бул ит 3 баш бодо малды тиштеп алган, алар 10 күндүк байкоодо турат", - дешет ведомстводон.
Жабыркагандардын бардыгы Кызыл-Кыя шаарындагы медициналык жардам көрсөтүү борборунун травматология бөлүмүнө жаткырылып, аларга кутурмага каршы иммуноглобулин жана кутурмага каршы вакцинанын шартсыз курсу дайындалган.
Инфекциянын жайылышын алдын алуу боюнча эпидемияга жана эпизоотияга каршы иш-чаралар улантылып жатканын кошумчадашты министрликтен.
Башкы беттеги сүрөт иллюстрациялык: PIXELS.COM.
