Министрлик: Токтогул суу сактагычында суунун көлөмү кризистик деңгээлге түшүшү мүмкүн
Токтогул суу сактагычындагы суунун көлөмү кооптуу деңгээлге чейин төмөндөшү мүмкүн, учурда суу сактагычтагы суунун көлөмү 7,7 миллиард куб метрди түзөт. Бул туурасында бүгүн, 4-мартта маалымат жыйынында энергетика министринин орун басары Талайбек Байгазиев билдирди.
Ал белгилегендей, департамент суунун деңгээли 1-апрелге чейин 7,5 млрд куб метрди түзөт деп болжолдогон.
Келечекте Токтогул суу сактагычында суунун деңгээли кризистик абалга жетет деген коркунуч бар.
Байгазиев кыргызстандыктарды электр энергиясын колдонуу боюнча лимиттерин сактоого чакырды. Анын айтымында, Токтогул суу сактагычындагы суунун аздыгы учурда энергетика тармагындагы эң начар көрсөткүчтөрдүн бири.
"Жогорку керектөөгө байланыштуу автоматтык чектөө системасы иштеп жатат. Быйыл тең салмактуулуктун бузулушунан улам автоматтык чектөө системасы кечки убактарда иштеп жатат. Ошондуктан кээ бир аймактарда жөнгө салуу чаралары (жарык өчүрүү) болушу мүмкүн", - дейт Байгазиев.
Эске салсак, Токтогул ГЭСи Кыргызстандын энергетикалык очогу болуп саналат. Өлкө кийинки кыштан кантип чыгаары суунун деңгээлине жараша болот.
Суу сактагычтагы суунун көлөмү 6,5 миллиард куб метрге түшкөндө кризистик абал деп эсептелет. Бул абалда Токтогул ГЭСинин иши токтойт.
