Адахан Мадумаров Азимбек Бекназаров менен беттеш кандай болгонун айтып берди (видео)
Жогорку Кеңештин депутаты Адахан Мадумаров Башкы прокуратурадагы сурактан чыкты. Ал 4,5 саат тергөө кызматында болуп, Баткен облусунун Тажикстан менен чектеш аймагындагы Төрт-Көчө участогун ижарага алуу боюнча протоколдун негизинде козголгон кылмыш ишинде көрсөтмө берген.
Мадумаровдун айтымында, ага бир эле суроону 205-жолудай беришкен.
"Бул эмне экенин түшүнгөн жокмун. Алар мени дүйшөмбү күнү кайра суракка кел деп айтышты", - деп ачууланды саясатчы.
Мадумаров Кыргызстандын мурдагы башкы прокурору Азимбек Бекназаров менен болгон беттешке токтолду.
"Бекназаров менин көзүмчө бош казандын астына от жагууну токтоткула деп мындай иш менен алыска бара албай турганын айтты", - деди Мадумаров.
Ал кошумчалагандай, Бекназаров негизинен Өмүрбек Текебаевдин сөзүн кайталаган.
"Бекназаров Мадумаровду каралоо үчүн видеону монтаждоону токтотууга үндөдү. Мага каршы бир нерсе издөөнү токтотууну сунуштады", - деп жыйынтыктады депутат.
