Токмокто 80 жаштагы киши зордуктады деген кыздардын бири кош бойлуу болуп калган
Токмок шаарында 80 жаштагы карыя жашы жете элек эже-сиңдини зордуктаган деп шектелүүдө. Бул тууралуу Чүй облустук ички иштер башкы башкармалыгынан билдиришти.
Белгилүү болгондой, 19-декабрда балдар иштери боюнча инспектор ички иштер бөлүмүнүн жетекчисине арыз менен кайрылып, 12 жаштагы Г.Н. кош бойлуу экенин маалымдаган. Секелектин 8 айлык боюнда бар экени аныкталган.
Бул факты ошол эле күнү каттоого алынып, текшерүү иштери башталган. Эртеси, 20-декабрда 1987-жылы туулган Г.Р. милицияга арыз менен кайрылган. Ал 2008-жылы жана 2010-жылы туулган кыздарын 80 жаштагы Д.В. аттуу тургун алдоо жолу менен үйүнө азгырып барып, зордуктаганын айткан. Бул окуя боюнча "зордуктоо" беренеси менен кылмыш иши козголгон.
Такталгандай, эки кыз тең 2022-жылдын жаз айынан бери шектүүнүн үйүн жыйноого жардам берип жүрүшкөн. Соттук-медициналык, соттук-психиатриялык жана соттук-психологиялык экспертизалар дайындалып, корутундулары даяр боло элек. Кылмыш ишинин бардык катышуучулары суракка алынган, бирок шектүү кармала элек.
Сүрөт иллюстрациялык.
