Жактоочу: Өмүрбек Бакировго айып тагылды, бирок эч кандай далил жок
Жогорку Кеңештин мурдагы депутаты Өмүрбек Бакировго добуштарды сатып алуу боюнча айып тагылды. Бул тууралуу Kaktus.media сайтына юрист Назгүл Сүйүнбаева билдирди.
Анын айтымында, кечээ, 29-августта Ош облусунун ички иштер башкармалыгынын тергөөчүсү Бакировду төрт саатка жакын суракка алган. Жыйынтыгында экс-депутатты Жогорку Кеңешке шайлоодо добуштарды сатып алуу боюнча айыптаган. Ага эч жакка кетпөө тууралуу жазуу түрүндөгү баш коргоо чарасы тандалды.
"Тергөөчү Бакировдон сурактын себебин ачыкка чыгарбоо боюнча келишимге кол койдургусу келген, бирок баш тартылгандыктан акт түзүлдү. Бакиров бул боюнча маалымат каражаттарына комментарий береби билбейм. Эгер комментарий берсе тергөөдө бул эпизод боюнча кошумча суроолор болот, биз ачыкка чыгарбоо келишимин талашпайбыз. Анткени бул убакытты текке кетирүү, эми биз бул ишке көңүл бурушубуз керек", - деп түшүндүрдү адвокат.
Ал белгилегендей, буга чейин Ош облусунун ички иштер башкармалыгында шайлоочуларды сатып алуу фактысы боюнча кылмыш иши козголуп, Өмүрбек Бакировду тааныбай турганын сотто билдирген эки адам кылмыш жоопкерчилигине тартылган.
"Сотто сурак учурунда Бакиров менен тааныш экенин жокко чыгаргандардын протоколу бар. Тергөөчүнүн айтымында, азыр ошол эле күбөлөр ар кандай көрсөтмөлөрдү берип жатыптыр. Бирок биз бул күбөлөргө басым болгон деп эсептейбиз. Тергөөчү далилдер бар экенин айтып, бирок иш менен тааныштырган эмес", - деди Сүйүнбаева.
Ал ошондой эле иште Бакировдун адамдары делингендер 30 тонна цементти айылдардын бирине алып барганы, бирок жеткирилгени жана төлөнгөнү боюнча эч кандай далил жок экенин айтты.
Эске салсак, шайлоо өнөктүгү маалында талапкер Бакировдун аракеттери боюнча арыздар түшкөн. Ош ОИИБи 2021-жылдын 7-ноябрында №4 Көк-Жар шайлоо округу боюнча бир мандаттуу депутаттыкка талапкер Жаңы-Ноокат айыл аймагындагы ичүүчү суу жана жолдорду оңдоо маселелерин чечип берүүнү үгүт учурунда убадалаганын билдирген. 9-ноябрга караган түнү талапкердин атынан 57 жаштагы жергиликтүү тургунга таандык курулуш кампасына 149 миң сомдон ашык 30 тонна цемент жеткирилген. Бул боюнча башкармалыктан "Кылмышка шериктеш болуу" жана "Шайлоочуларды сатып алуу" беренелери боюнча тергөө жүрүп жатканын билдиришкен. Мындан тышкары талапкердин өкүлдөрү ээсинин өкүлдөрү Кылмыш-жаза кодексинин "Административдик ресурсту кыянаттык менен пайдалануу" беренеси боюнча жосунсуз жорук жасаган деп шектелген.
