Чүйдөгү "Жунда" заводуна бензиндин өндүрүшүн көбөйтүү тапшырмасы коюлду
Президенттин өзгөчө тапшырмалар боюнча атайын өкүлү Бакыт Төрөбаев Чүй облусундагы "Жунда" мунай иштетүүчү заводунда болду.
Министрлер кабинетинин басма сөз кызматы маалымдагандай, Төрөбаев заводдун жетекчилигине мунай өндүрүүнүн көлөмүн көбөйтүү тапшырмасын берди.
Тагыраагы, мунайдын көлөмүн айына 24 000 тоннага, ал эми ушул жылдын аягына чейин бул көрсөткүчтү 50 000 тоннага жеткирүү тапшырмасы коюлду.
Андан тышкары, мамлекеттик "Кыргыз мунай корпорациясы" менен кызматташуу милдеттендирилди. Ага ылайык, мамлекеттик компания кайра иштетүү үчүн заводго чийки зат жеткирүүнү камсыз кылат, ал эми өндүрүлгөн мунай заттары Кыргызстандын ички рыногуна чыгат деп пландалууда.
"Жунда" - Кыргызстандагы эң ири мунай иштетүүчү заводдордун бири. Модернизациядан кийин бийлик анын кубаттуулугун ички рынокту бензин жана башка мунай продуктулары менен толук камсыз кылуу үчүн пайдаланууну көздөп жатат.
Белгилесек, буга чейин Россияда бензин менен дизель тартыш болуп, күйүүчү майдын экспортун чектегени маалымдалган.
