Аида Салянова шахмат союзунун президенти болду
Мурдагы башкы прокурор, саясий ишмер Аида Салянова Кыргыз шахмат союзунун жаңы президенти болуп шайланды. Бул тууралуу 23-майда бирикменин жалпы жыйынында белгилүү болду.
Буга чейин шахмат союзун ишкер Бабур Төлбаев жетектеп келген.
Аида Салянова Кыргыз шахмат союзунун президенти болуп шайланышы эң оболу бүтүндөй шахмат коомчулугу жана өлкө алдында өтө чоң жоопкерчилик экенин белгилеген.
"Эң оболу мага көрсөткөн ишенимиңиздер үчүн чын жүрөктөн терең ыраазычылык билдирем", - деп жазган ал Фейсбук баракчасына.
Жаңы жетекчи мамлекет тарабынан шахматка көрсөтүлүп жаткан колдоону тарыхый деңгээлде деп баалап, бул ишенимди конкреттүү жыйынтыктар, системалуу эмгек жана ар бир сомду натыйжалуу пайдалануу менен актоого милдеттүүбүз деген.
Биздин максат - короодогу жана мектептеги шахматтан эл аралык жетишкендиктерге чейин, өзүнчө демилгелерден мамлекеттик бирдиктүү өнүгүү стратегиясына чейин туруктуу системаны куруу.
Белгилей кетсек, Аида Салянованын кызы шахмат боюнча бир катар ийгиликтерге жетишип, Кыргызстандын атынан бир топ эл аралык таймаштарга катышып, алдыңкы орундарды ээлеп келет.
