Аз камсыз болгон үй-бүлөлөргө электр энергиясына компенсация төлөнүшү мүмкүн
2027-жылдын 1-январынан тарта "Үй-бүлөгө көмөк" жөлөкпулун алган аз камсыз болгон үй-бүлөлөргө электр энергиясына ай сайын компенсация төлөнүшү мүмкүн.
Бул боюнча токтомдун долбоору коомдук талкууга чыгарылды. Аны Эмгек, социалдык камсыздоо жана миграция министрлиги даярдаган.
Компенсация электр энергиясынын тарифи менен 1 кВт саатына 50 тыйындык тарифтин айырмасынын негизинде эсептелет.
Компенсация:
* жайында айына 400 кВт саатка чейин;
* кышында 700 кВт саатка чейин берилет.
Аны алуу үчүн өзүнчө арыз берүүнүн кереги жок. Компенсация "Үй-бүлөгө көмөк" жөлөкпулу менен кошо автоматтык түрдө дайындалат.
Министрликтин маалыматына ылайык, 2026-жылдын 1-июлуна карата "Үй-бүлөгө көмөк" жөлөкпулун 41 695 үй-бүлө алган.
Жаңы төлөмдөргө 448,6 млн сом каражат талап кылынат.
