Ошто улуу кишини сабаган балдардын экөө камакка алынды
Ош шаарында коомдук тынчтыкты сактоого чакырган кишини токмоктогон балдар кармалып, экөө убактылуу кармоочу жайга киргизилди.
Шаардык ички иштер башкармалыгынан билдиришкендей, окуя 4-августта таңкы саат 05:00 чамаларында болгон. Тергөөнүн алгачкы маалыматына караганда, коомдук тынчтыкты сактабаган балдарды 1969-жылы туулган жаран тынчтыкты сактоого чакырган. Жигиттер муну туура эмес кабыл алышып, эскертүү берген кишини сабап салышкан.
Ошол эле күнү окуяга тиешеси бар 2007-жылы туулган үч бала, 2008-жылы туулган бир бала кармалган.
Милиция окуянын активдүү катышуучусу деп 2007-жылы туулган К Н. жана 2008-жылы туулган А.Б. аттуу балдарды 48 саатка камады. Алардын үстүнөн 280-берененин 2-бөлүмүнүн 2-пункту менен кылмыш иши козголгон.
6-августта Ош шаардык соту балдардын баш коргоо чарасын карайт дешти башкармалыктан.
