Өзгөндө таңга маал жер көчкү түштү
Өзгөн районунда бүгүн, 22-мартта жер көчтү. Өзгөчө кырдаалдар министрлигинин маалыматына ылайык, таңкы саат 05:00 чамасында Өзгөндүн Кызыл-Күңгөй тилкесинде жер кыртышы активдешип, болжол менен 1 млн м3 жер көчкү түшкөн.
Жер көчкү аталган тилкедеги 18 турак үйгө коркунуч жаратып, үйлөргө 300 метр аралык калган.
Учурда айыл өкмөт тарабынан турак үйлөрдүн тургундарын коопсуз жайга көчүрүү иштери жүргүзүлүүдө. Жеринде Өзгөчө кырдаалдар министринин орун басары Акылбек Мазариповдун жетекчилигинде Ош облустук башкармалыгынын башчысы, Мониторинг департаментинин орун басары, райондук Өзгөчө кырдаалдар бөлүмүнүн башчысы иш алып барууда. Ошондой эле Өзгөн районунун Жарандык коргонуу кызматтарына "айгай" жарыяланып, өзгөчө кырдаалды алдын алуу иштери жүргүзүлүүдө.
