Ошто кирпич заводдо иштеген чет элдик жаран станокко кулап, каза болду
Ош облусунун Кара-Суу районундагы кирпич заводдо иштеген кытай жараны өндүрүштүк жабдыкка кулап каза болду. Бул тууралуу редакцияга облустук ички иштер башкармалыгынан билдиришти.
Милициянын маалыматына караганда, окуя 26-июлда саат 20:00 чамасында катталган. Кырсык Жаңы-Арык айылындагы "Чыгыш курулуш материалдары" ЖЧКсынын кирпич заводунда болгон.
"Тергөө иштеринин жүрүшүндө каза болгон киши - 1979-жылы туулган кытай жараны Д.Ю.Х. экени, заводдо технолог болуп иштеп жатканы аныкталган. Алдын ала маалыматтарга караганда, саат 18:30 чамасында ал жумуш учурунда белгисиз жагдайларда кокустан иштеп жаткан өндүрүштүк станокко кулап, алган жаракаттарынан улам окуя болгон жерде каза болгон", - дешти башкармалыктан.
Окуя каттоого алынып, соттук-медициналык экспертиза дайындалды. Учурда тергөө жана текшерүү иш-чаралары жүрүп жатканы маалым болду.
Башкы беттеги сүрөт иллюстрациялык.
