Бишкекте Мыктыбек Абдылдаев менен коштошуу зыйнаты өттү
Бүгүн, 10-июнда мурдагы депутат, мурдагы башкы прокурор жана мамлекеттик ишмер Мыктыбек Абдылдаевди акыркы сапарга узатуу зыйнаты өттү.
Маркумду акыркы сапарга узатууга анын туугандары жана жакындары, достору, кесиптештери, ички иштер органдарынын ардагерлери, мамлекеттик органдардын жана коомчулук өкүлдөрү катышты.
Мыктыбек Абдылдаев 1953-жылдын 17-августунда Чүй облусунун Кара-Жыгач айылында төрөлгөн. Эмгек жолун заводдо токарь болуп баштап, комсомолдо иштеп, кийин ички иштер органдарында ар кандай кызматтарды аркалаган.
Ал 2002-2005-жылдары башкы прокурор, ал эми 2005-2007-жылдары президенттик администрациянын жетекчиси кызматтарын аркалаган.
Жогорку Кеңештин V жана VI чакырылыштарынын депутаты болгон. V чакырылышта төраганын орун басары, комитет төрагасы, ошондой эле фракция лидери болуп иштеген.
Мыктыбек Абдылдаев юридика илимдеринин кандидаты, Кыргыз Республикасынын эмгек сиңирген юристи, мамлекеттик кызматтын 1-класстагы мамлекеттик кеңешчиси жана милициянын генерал-лейтенанты болгон.
