Ура! Жакында Жукеев-Пудовкин жана Матросов көчөлөрү ачылат
Бишкекте тыгын пайда болуп жаткан үч көчө 10-сентябрда ачылат. Бул тууралуу Kaktus.media редакциясына Бишкек мэриясынын капиталдык курулуш башкармалыгынын башчысынын орун басары Улан Уезбаев билдирди.
Анын айтымында, Жукеев-Пудовкин көчөлөрү Ахунбаевден Горькийге чейин, Матросов Ахунбаевден Медеровго чейин, ошондой эле Карасаевдин Юнусалиевден Байтик баатырга чейинки бөлүгү жаңы окуу жылы башталганга чейин ачылат.
"Унаа жолу ачылгандан кийин тротуарлардын курулушу параллелдүү түрдө жүргүзүлөт", - деди Уезбаев.
Анын айтымында, быйыл 42 участок курулуш жана ремонт иштерин жүргүзүү үчүн жабылган. Буга чейин алардын ону ачылса, дагы онун 10-сентябрда ачуу пландалууда. Ал эми 18и 30-октябрга чейин ачылат. Калган төрт объект кийинки жылга калтырылат:
- Жайил Баатыр көчөсү Түштүк магистралдан Арча-Бешик конушундагы Алыкулова көчөсүнө чейин;
- Архитекторлор көчөсүндөгү Кичи Чүй каналынын үстүндөгү көпүрө;
- Гидроконструкторлор көчөсүндөгү "Эне-Сайдагы" Аламүдүн дарыясы аркылуу өткөн көпүрө;
- Учкун кичи районундагы Чүй проспектиси.
Сухэ-Батор көчөсүнүн боюндагы Каралаев жана Шабдан Баатыр көчөлөрүн бириктирген көпүрө октябрь айынын аягына чейин бүткөрүлөт.
"Фундамент жана таянычтар даяр. Устундардын орнотулушу жүрүп жатат. Көчөнүн батыш бөлүгүндөгү жумуш аяктады. Биз жакын арада Каралаевге жакыныраак жердин курулушун баштайбыз", - деди УКС жетекчисинин орун басары.
