Садыр Жапаров МИКке өткөрүп берген (мурун өзү жашаган) үй канчага сатылды
"Мамлекеттик ипотекалык компания" ААКсы (МИК) тарабынан берилген Садыр Жапаровдун үйү 28 миллион 49,5 миң сомго сатылды. Бул тууралуу 24.kg агенттиги Мамлекеттик шайлоо комиссиясына шилтеме берүү менен билдирди. Үйдү сатып алган адам атын атагысы келген эмес.
Садыр Жапаровдун МИКке өткөрүп берген эки кабаттуу үйү 2021-жылдын аягында 33,7 миллион сомдук баштапкы баасы менен аукционго коюлган. Бирок үйдү эч ким сатып алган эмес. Кийинчерээк баа 28 миллион 46,8 миң сомго чейин төмөндөтүлгөн.
Эске салсак, Садыр Жапаровдун үй-бүлөсү 30-сентябрда үйдү МИКке өткөрүп берген. Бул үйдө мурун президент өзү жашаган. Анын айтымында бул аракетинин максаты жеке турак жай рыногун жакшыртуу жана "Менин үйүм 2021-2026" жаңы мамлекеттик турак жай программасынын алкагында МИКке муктаж болгондорду турак-жай менен камсыздоого жардам берүү. Белгилей кетсек, Жапаровдордун үй-бүлөсү бул үйдү жеке бала бакча катары көп жылдар бою ижарага алып келишкен.
