Токко урунуп каза тапкан баланын өлүмү боюнча кылмыш иши козголду
Бишкек шаарынын Октябрь РИИБи тарабынан токко урунуп каза тапкан баланын окуясы боюнча кылмыш иши козголду. Бул тууралуу милициядан билдиришти.
Белгилесек, окуя 26-июлда саат 20:13тө катталган. 9 жаштагы Ибрахим Анарбеков арыкта ойноп жатып электр тогуна урунуп, оор абалда оорукананын жандандыруу бөлүмүнө жеткирилген. Кийинчерээк ал эсине келбей каза болду.
Маалым болгондой, 2-августта 272-берене "Тоо-кен, курулуш же башка жумуштарды аткарууда коопсуздук эрежелерин бузуу" боюнча кылмыш иши козголду.
"Учурда милиция кызматкерлери окуянын бардык жагдайларын ар тараптуу жана объективдүү аныктоого багытталган тергөө иш-чараларын жүргүзүп жатат", - деп айтылат маалыматта.
Тергөөнүн жыйынтыгынын негизинде мыйзамга ылайык процессуалдык чечим кабыл алынат.
Башкы беттеги сүрөт иллюстрациялык.
