Авиабилеттин айынан кыргызстандык спортчулар чемпионатка катыша албай калышты
Кыргызстандын таэквондо курама командасы Монголиядагы Азия чемпионатына катыша албай калды. Бул тууралуу Kaktus.media сайтына ITF таэквондо федерациясынын вице-президенти Сардор Рахимшаихов билдирди.
Анын айтымында, курамында 36 спортчусу бар топ учакка билет тапканы менен мелдеш үчүн берилген мөөнөттү өткөрүп жиберди. Ошондой эле керектүү сумманы кыска убакыттын ичинде чогултканга жетишпей калышты.
Рахимшаихов белгилегендей, билеттерди алып бермекчи болгон аял спортчу балдардын биринин ата-энесинин таанышы болгон.
"Билеттердин баасы анчалык арзан эмес болчу, бирок бир аз айырмачылык болгон. Ошондуктан бул эч кандай шектенүү жараткан эмес. Балдар республиканын ар тарабынан чемпионатка бара жатса, ата-энелери бай болбосо, мүмкүн болушунча эң ыңгайлуу варианттарды тандайсың да", - деп кошумчалады ал.
Спортчулардын биринин апасы Kaktus.media агенттигине башка көптөгөн ата-энелер сыяктуу эле баласын чемпионатка жөнөтүү үчүн дээрлик бир жылдай акча чогултканын айтты.
"Биз бардык чыгымдарды, учак билетин гана эмес, жатакананы жана тамак-ашты да төлөдүк. Анан албетте, бир нече эсе арзан болбосо да, бир аз арзаныраак билеттерди сунуштаганда, ар бир ата-эне макул болот. Өкмөттөн эч кандай жардам болгон жок", - деди ал.
Ал ата-энелер кыска убакыттын ичинде мынчалык көп акча чогулта албай калганын жана балдары чемпионатка бара албай калганын белгиледи.
Эске салсак, буга чейин Кыргызстандын таэквондо боюнча курама командасы алдамчылыктын айынан Монголиядагы чемпионатка убагында уча албай калганы маалым болгон. Спортчуларды авиабилет менен камсыздай турган жеке жак 2 миллион сомдон ашык каражатты алганы менен иш жүзүндө билеттер алынган эмес. Бул факты боюнча "Алдамчылык" беренеси менен из козголуп, 33 жаштагы аял кармалды.
Ал эми Дене тарбия жана спорт мамлекеттик агенттиги Азия чемпионатына катышмакчы болгон таэквондочулар Кыргыз Республикасынын улуттук курама командасынын мүчөлөрү эместигин, ошол себептүү мамлекет тарабынан каржыланбаганын билдирген.
