Ысык-Көлдө унаа кыймылына убактылуу чектөөлөр кирет. Себеби
2022-жылдын 25-26-августунда Ысык-Көл облусунун жолунда унаа кыймылына убактылуу чектөөлөр кирет. Бул тууралуу жол кыймылынын коопсуздугун камсыздоо башкы башкармалыгынын (ЖКККББ) басма сөз кызматы билдирди.
Маалыматка ылайык бул күндөрү Чолпон-Ата шаарында Евразия өкмөттөр аралык кеңешинин жана КМШ жана ЕАЭБ Жаштар форумунун жыйыны өтөт. Ага ЕАЭБге мүчө мамлекеттердин өкмөт башчылары, ошондой эле байкоочу өлкөлөрдүн өкүлдөрү келишет.
Буга байланыштуу Ысык-Көл облусунда Тамчы айылындагы Ысык-Көл аэропортунан Чолпон-Ата шаарына чейинки каттамда, ошондой эле Чолпон-Ата-Кырчын багытында делегациялар өтүүчү маалда гана унаа кыймылына убактылуу чектөөлөр киргизилип, жол боюнда кароосуз калтырылган унаалар эвакуацияланат.
ЖКККББ өткөрүлүп жаткан иш-чаралардын мамлекеттик маанилүүлүгүн эске алуу менен, Ысык-Көл облусунун тургундарын жана конокторун чектөөлөргө түшүнүү менен мамиле жасап, эрежелерди жана айдоо маданиятын сактоону, унааларды жол боюнда кароосуз калтырбоону жана каршы тилкелерге чыкпоону суранат.
