Кызыл-Кыядагы жигиттердин мушташы эмнеден чыкканы белгилүү болду
Социалдык тармакка Кызыл-Кыя шаарында топ балдардын мушташкан видеосу тараган. Окуя 19-сентябрда болгонун Баткен ОИИБден маалымдашып, окуянын жагдайларын айтышты.
Милициянын нөөмөт бөлүмүнө Кызыл-Кыя шаарынын Асаналиев көчөсүндө бир топ балдардын урушуп жаткандыгы кабарланып, маалымат каттоого алынган.
Тергөөгө чейинки текшерүүнүн алкагында мушташка Кызыл-Кыя шаарынын 22-23 жаштагы 3 тургуну, Ош облусунун Ноокат районунун 24-25 жаштагы 3 тургуну катышканы аныкталды.
Жигиттер 19-сентябрь күнү болжол менен саат 15:00 чамаларында Кызыл-Кыя шаарынын Асаналиев көчөсүндө жөө адамдар өтүүчү өтмөктө бара жатып жол талашып, ортодо пикир келишпестик жаралган. Анда Кызыл-Кыя шаарынын тургуну М.Э. менен Ноокат районунун тургуну А.Б. урушуп кеткен. Бирок алар ошол эле жерден жарашып, кол алышып кетишкендиги белгилүү болду.
Тараптардын бири-бирине карата арыз доосу жок.
