Сотко келген Камчыбек Ташиев журналисттердин суроолорун жоопсуз калтырды. Видео
Бүгүн, 15-июнда Бишкектин Биринчи Май райондук сотунда УКМКнын мурдагы башчысы Камчыбек Ташиевге, мурдагы башкы прокурор Курманкул Зулушевге, парламенттин мурдагы төрагасы Нурланбек Тургунбек уулуна жана "75чилердин каты" деп аталган иштин башка катышуучуларына карата козголгон иш боюнча биринчи ачык сот отуруму башталды.
Сотко келген Камчыбек Ташиев журналисттердин көптөгөн суроолоруна жооп берүүдөн баш тартты.
Сот имаратынын короосундагы көптөгөн мамлекеттик күзөтчүлөр жана милиция кызматкерлери Ташиевге эч кимди жолотпой жатышты.
Иштин чоо-жайы: Камчыбек Ташиев 2026-жылдын 10-февралында УКМКнын төрагасы кызматынан бошотулган. Кийинчерээк Камчыбек Ташиевге карата "75чилердин каты" деген ат менен белгилүү болгон кылмыш иши козголгон. Ал бийликти күч менен басып алууну пландаган жана кызмат абалынан кыянаттык менен пайдаланган деп айыпталууда. Бул иш боюнча дагы Курманкул Зулушевге, Нурланбек Тургунбек уулуна, Бекболот Талгарбековго, Курсан Асановго, Курманбек Дыйканбаевге, Аалы Карашевге жана Эмил Узакбаевге да айып тагылган. Иштин материалдары жашыруун болуп, сот отурумдары жабык өтүп жаткан эле.
