"Ысык-Ата" санаторийинин мурдагы директоруна кылмыш иши козголду
Башкы прокуратура "Ысык-Ата" санаторийинде текшерүү жүргүзүлүп, жетекчилиги кылмыштуу бүтүмгө барганы аныкталды деп кабарлайт. Текшерүүнү Ысык-Ата райондук прокуратурасы жүргүзгөн.
Кабарлангандай, санаторийдин мурунку директору О.А.К. жана санаторийдин айрым кызматкерлери жеке ишкерлер менен материалдык кызыкчылыктарды максат кылып кылмыштуу бүтүмгө барышкан.
Тагыраагы, 2020-2022-жылдары жалпы суммасы 12 млн 996 миң 615 сомдук каражаттарды мыйзамсыз эсептен чыгарышкандыгы аныкталган. Ошондой эле эмеректерди жогорулатылган баада сатып алуу келишимдерин түзүшүп, санаторийге 1 млн 577 миң 602 сом зыян келтиришкен.
Бул боюнча райондук прокуратура тарабынан Кылмыш-жаза кодексинин 245-беренеси (Коммерциялык же башка уюмдардын кызматчыларынын ыйгарым укуктарын кыянаттык менен пайдалануусу) менен кылмыш иши козголуп, тергөө амалдары жүргүзүлүүдө.
