Бүгүн декларация тапшыруунун акыркы күнү
Бүгүн, 2-май салык декларациясын тапшыруунун акыркы күнү. Салык органдары декларацияларды саат 09:00дөн түнкү саат 00:00гө чейин кабыл алат.
Белгилесек, буга чейин майрам күндөрүнө байланыштуу салык декларациясын тапшыруунун акыркы мөөнөтү 2-майга жылдырылган.
Мамлекеттик салык кызматынан билдиришкендей, декларация тапшыруунун акыркы күнү жекшемби, 30-апрелге туура келип, 1-май майрам күнү деп белгиленген. Буга байланыштуу салык мыйзамдарына ылайык, салык декларациясын тапшыруу мөөнөтү 2-майга чейин узартылган болчу.
Көрсөтүлгөн мөөнөткө чейин салык декларациясын төмөнкүлөр тапшыруусу керек:
- жеке ишкерлер, анын ичинде патент менен иштегендер;
- менчигинде салык салынуучу мүлкү жана жер участогу (короо-жай участокторунан тышкары) бар жеке жактар;
- юридикалык жакты түзбөстөн иштеп жаткан дыйкан жана фермердик ишканалар;
- мамлекеттик органдын же жергиликтүү өз алдынча башкаруунун карамагында турган мекемелердин, ишканалардын же уюмдардын калкты тейлөө боюнча илимий-изилдөө, чыгармачылык, окуу-педагогикалык, дарылоо, рекреациялык жана башка аткаруучулук жана тескөөчүлүк функцияларына байланышпаган кызматкерлер;
- мамлекеттик же муниципалдык кызматчы болуп саналбаган мамлекеттик үлүшү бар уюмдардын жана ишканалардын кызматкерлери;
- жашоого уруксаты бар же кайрылман статусу бар, эл аралык уюмдардагы ишмердүүлүктөн киреше алган жарандар;
- жыл ичинде 300 миң сомдон ашык суммага мүлккө ээ болгон жеке жак.
Жеке ишкерлер декларацияны электрондук түрдө, ал эми жеке жактар өзү каалагандай электрондук же кагаз түрүндө тапшырышы керек.
Башкы беттеги сүрөт иллюстрациялык.
