Бала эмдөөдөн кийин каза болгон. Апасы дарыгерлерди күнөөлөп жатат
Нарын облусунан оор абалда алып келинген бала Бишкектеги балдар ооруканасында каза болду. Апасы президент Садыр Жапаровго, УКМКнын башчысы Камчыбек Ташиевге жана башкы прокурор Курманкул Зулушевге кайрылды. Эне наристеси дарыгерлердин шалаакылыгынан улам чарчап калган деп эсептейт.
Келин видеокайрылуусунда 2023-жылдын 25-апрелинде Кара-Суу айылында бир жашар баласына кызамык оорусуна каршы эмделгенин белгилейт.
"Бирок дарыгерлер эмдөө алдында баланы текшерген жок. "Биз билебиз" дешти. Эмдөөдөн кийин дене табы көтөрүлүп, конвульсиялар башталып, бала Ат-Башы аймактык ооруканасынын реанимация бөлүмүнө жаткырылды", - дейт ал.
Айтымында, эртеси ымыркайды жугуштуу оорулар бөлүмүнө которушкан, бирок ал жерде дене табы түшкөн эмес, алсыздык болгон. Ал кайрадан реанимацияга которулган. Ооруканадан диагноз коё алышпай, өпкөнүн томографиясына тартканда таза болуп чыккан. Анан канында инфекция бар деп антибиотик сайып, ар кандай дарылар менен дарылай башташкан.
Бирок жылыш болбой, ата-энеси Нарынга которууну суранышкан, бирок дарыгерлер макул болушкан эмес.
"Төртүнчү күнү баланын тамак жегенге, шилекейин жутканга күчү жетпей калганда гана Нарынга которулган. Ал эми Нарындагы дарыгер баланы көрөр замат тез арада Бишкекке алып баргыла деген", - дейт эне.
Бишкекте алар баланын абалы оор экенин жана реанимацияга жаткырылганын билдиришкен. Ал эсине келбей төртүнчү күнү каза болгон.
